Ербол Қарашөкеев «Тараз» қант зауытындағы жаңғырту жұмыстарын тексерді
Жамбыл облысының әкімі Ербол Қарашөкеев «Тараз» қант зауытын жаңғырту жұмыстарының барысымен танысып, кәсіпорынды іске қосуға дайындық деңгейін тексерді.
«Тараз» қант зауыты 2003 жылдан бері қант қызылшасын өңдеу және қант өндіру жұмыстарын тоқтатқан болатын. 2025 жылдан бастап кәсіпорынның өндірістік қызметін қайта жандандыру мақсатында жаңғырту жұмыстары қолға алынған.
«ТСЗ» ЖШС-ның директоры Федор Семеновтің айтуынша, зауытты іске қосуға дайындық жұмыстары 93-95 пайызға орындалған.
Жобаның жалпы құны – 12,4 млрд теңге. Кәсіпорын іске қосылғаннан кейін жылына шамамен 250 мың тонна қант қызылшасын өңдеуге қауқарлы болады. Өндірістік қуаты тәулігіне 3 мың тонна қант қызылшасын өңдеуге жетеді.
Қазіргі уақытта негізгі өндірістік нысандардағы құрылыс-монтаж жұмыстары жүргізілуде. Қажетті іргетастардың басым бөлігі аяқталып, негізгі технологиялық жабдықтар жеткізіліп, монтаждау жұмыстары атқарылуда.
Сонымен қатар жылу электр станциясында бу қазандықтары, сүзгілер, түтін сорғыштар мен желдеткіштер орнатылған. Өндірістік цехтар мен станциялардың технологиялық құбырларын монтаждау, электр кабельдерін жүргізу жұмыстары жалғасуда. Бұған дейін пайдаланылған жабдықтардың бір бөлігі қайта қалпына келтіріліп, жөндеуден өткізілді.
Жұмыстарды белгіленген мерзімде аяқтау мақсатында 10 мердігер ұйымның және зауыттың 1000-ға жуық қызметкері екі ауысымда еңбек етуде.
Кәсіпорында қант қызылшасын қабылдауға қажетті таразылар орнатылып, зертхана жөнделіп, қажетті құрал-жабдықтармен қамтамасыз етілді.
Мемлекет тарапынан кәсіпорынға қажетті жер телімдерін рәсімдеу, газ және электр қуатының көлемін арттыру бойынша қолдау көрсетілген.
Өңір басшысы зауыттың уақытылы іске қосылуымен қатар, биылғы өнімді толық әрі кідіріссіз қабылдаудың маңыздылығына тоқталды.
– Жұмыс қарқыны жаман емес. Заманауи құрал-жабдықтар жеткізілген. Биыл қант қызылшасының өнімділігі жоғары. Енді бірде-бір өнім егістік алқаптарында қалмауы керек. Шаруалардың өнімін белгіленген кестеге сәйкес уақытылы қабылдау қажет. Кезек болмауы тиіс. Шаруаларға бекітілген кесте алдын ала жеткізілсін, – деді Ербол Қарашөкеев.
Облыс әкімі жауапты басқармалар мен кәсіпорын басшылығына зауытты іске қосу жұмыстарын жеделдетіп, қант қызылшасын қабылдау науқанын жүйелі ұйымдастыруды тапсырды.
Ауыл шаруашылығы басқармасының басшысы Әбдірәсіл Желеубаевтың айтуынша, зауыт 20 қазаннан кейін қант қызылшасын қабылдауды бастауды жоспарлап отыр.
Биыл облыста қант қызылшасы 9,9 мың гектарға егілді. Оның ішінде «Тараз» қант зауытын шикізатпен қамтамасыз ету мақсатында 94 шаруашылық 5,5 мың гектар алқапқа қант қызылшасын орналастырған.
Источник: Акимат Жамбылской области — gov.kz
