Депутаттармен қорытынды кездесу өткізілді

Бүгін аудан әкімі Сәкен Ғазизұлы Займолдиннің қатысуымен аудандық мәслихаттың VIII шақырылым депутаттарының өкілеттіктерінің мерзімінен бұрын тоқтатылуына орай салтанатты шара өтті.

Шара барысында ауданның қоғамдық-саяси өміріне белсене араласып, өңірдің дамуына үлес қосқан депутаттарға құрмет көрсетіліп, марапаттар табысталды.

Атап айтқанда, аудандық мәслихат депутаты Тілекбай Амиров «Облысқа сіңірген еңбегі үшін» төсбелгісімен марапатталса, Жангүл Ізғарина Ақтөбе облысының әкімі Асхат Шахаровтың Құрмет грамотасына, ал Айболат Оралов облыс әкімінің Алғыс хатына ие болды.

Сонымен қатар аудан әкімі Сәкен Займолдин өз атынан барлық депутаттарға Алғыс хат табыстап, ауданның дамуына қосқан үлестері мен атқарған еңбектері үшін ризашылығын білдірді.

Салтанатты шара барысында депутаттарға сый-құрмет көрсетіліп, олардың ел игілігі жолындағы қызметтеріне алғыс айтылды.

Ел игілігі жолындағы еңбектеріңіз жемісті болып, абыройларыңыз арта берсін!